AMAL PENTI PEMALI BA PENGAWA BUMAI

Ba pengawa bumai Iban endang bisi penti pemali iya empu. keterubah, umai orang Iban enda tau nadai panduk laban nya meh endur orang Iban betanamka leka utai tauka ngujakka paung terung, jagung, ubi enggau utai bukai. Kelimpah arinya, umai ke udah diperesi enda tau enda ditugal maya bulan nya mega.

 Umai patut diintu enggau piring ading ngambika bulih padi. Nya alai orang Iban meruan ngena adat lama lalu arap endar ke Petara asi. Laban Petara tu ulih meri sida tau bulih padi, bulih puli, enggau bulih jereki.  Nyadi pengawa nugal tu enda tau enda berengkah sebedau matahari niki.

 Ba pengawa bumai tu mega, orang Iban amat bepenti sereta bepanggai ba Burung magang. Keterubah iya nya maya berengkah ari kenyap sebedau ngabas pala tanah ke endur bumai. Tang enti nyema kenyap enda manah, dia sida tau enda ngabas tanah dulu lalu nganti ari ke siti maya ke manah kenyap. Nama kebuah, laban orang Iban endang arapka mimpi maya ke nurun ngereja pengawa bumai tauka pengawa bukai.

Ba pengawa bumai mega orang Iban pechaya ke bunyi burung. Ngambika chunto, lebuh manggul umai. Orang Iban deka nisih munyi burung dulu sebedau berengkah manggul umai. Kelimpah arinya, ba pengawa nasau mega orang Iban bepenti ngagai burung. Nyema sida enda nitihka penti burung nya, penusah deka nuntung sida.

Penti pemali ke bukai iya nya, pemali dikumbai mali labu. Reti iya bisi sekeda kitai Iban kelia mali nanam labu tauka genuk ba umai. Orang ketuai menya madah pengawa nanam labu nya mali, enggaika bisi bala ari sida sebilik mati taun nya mega. Bisi mega kitai Iban menya enda tau nanam lia enggaika sida sebilik nya bisi buta taun nya. Sebengkah agi penti pemali maya bumai iya nya, umai mali diabas (mali pagi ). Nitihka penemu orang tuai, umai mali diabas orang bukai maya pagi hari. Kena nyeliahka pemali tu, iya dulu mansang ke umai lalu nugal sereta menih tiga lubang padi enggau makai tiga suap asi. Senentang enggau makai asi nya mega iya enda tau ditanya orang, mali sida sebilik bisi parai taun nya. Tang enti sema bisi orang nanya iya, orang nya deka ditunggu ngena siku babi tauka manuk enggau benda sigi panding sereta duit dua ringgit.

Kelimpah arinya, enchuri padi ba umai orang pan mali sereta enda tau dikereja. Enti ditemu, orang nya deka ditunggu sigi mungkul, duit 50 sen enggau siku manuk. Niti jalai tama ke umai orang dalam kandang tiga hari udah nugal mega mali lalu tau kena tunggu manuk siku enggau duit semungkul. Kitai Iban mega enda tau ngerusakka pandung endur engkah batu umai benung orang begawai batu. Ukum penyalah tu besai iya nya, sigi alas ngerang, duit lima ringgit, siku babi sepa enggau nyabur sebilah. Orang Iban endang bepegai teguh ba penti pemali maya bumai laban sida enggaika sida enda bulih padi dalam taun bumai nya.

Tang kamaya hari tu, pengawa penti pemali bumai tu nyau makin lenyau tauka jarang dipejalaika agi. Nama kebuah, laban penama biuh pengarap ari pengarap kristian. Pengawa bebiau, miring enggau beburung ba adat bumai kelia nyau enda entu dititihka agi raban bansa Iban. Kelimpah arinya, bansa Iban kediatu, nyau makin mayuh ngereja pengawa bukai baka kereja ke tasik, mangku pengawa perintah enggau kebukai. Nya alai, ba penti pemali bumai tu patut diintu enggau kur sereta manah.