Konsep Pengaya enggau Seridi

Konsep Pengaya enggau Seridi proses ngajar enggau belajar

Pengawa pengaya enggau seridi tu nya siti pengawa pelajar ti beguna amat dipejalaika dalam kelas. Kebuah pia laban nengah dua iti pengawa  tu, pengelebih enggau pengelemi siku-siku nembiak ke diajar nya deka ditemu lalu dikemetulka. Nya alai, tanggung pengawa bala pengajar besai amat mantu sereta bejalaika aktiviti pengaya enggau seridi tu dalam kelas. Keterubah iya kitai deka bejuraika konsep pengawa pengaya enggau seridi tu dalam bidang pelajar.

            Dalam Kamus Dewan Edisi ke-4 (2007), leka jaku “seridi” tu ngemai reti sesebengkah pekara ti betukar ngagai asal iya baka selama. Dalam konteks pelajar seridi tu bekaul enggau nembiak ti ngembuan penanggul dalam pengawa belajar iya di sekula. Faridah Nazir enggau Tuan Jah (2013) dalam bup Pengajian Sukatan Pelajaran Bahasa Melayu Sekolah Rendah meri konsep seridi tu nya aktiviti seridi ti bekaul enggau anak mit tauka nembiak ke ngembuan penanggul dalam pelajar. Syarifah Alwiah Alsagoff (1983) bejuraika, seridi tu siti langgur ke silik kena mutarka pelajar ti ngembuan penekul dalam kelas. Sechara selampur, nembiak seridi tu ngemai reti iya nya genap nembiak ti ngembuan tikas prestasi tauka pengulih sida dalam pelajar ti baruh agi ari bala nembiak bukai.

 Ba konteks tu, tanggung pengawa genap iku pengajar beguna amat ngelanggur mayuh bengkah aktiviti seridi ti nemban sereta seriran ngagai nembiak seridi tu. Ngena chara tu, penanggul nembiak seridi tu deka ulih diputarka tauka dikurangka. Kelimpah ari nya, aktiviti seridi tu nya siti chara khas ti digaga bala pengajar dikena mantu nembiak ti ngembuan penanggul belajar dalam nguasa sesebengkah pengelandik asas baka pengelandik macha, nulis enggau ngira. Nyadi, nembiak seridi tu patut bendar diberi kereja tauka latih seridi ke seriran dikena mutarka tauka ngurangka agi penekul sida dalam nguasa pekara ti diajar dalam kelas.

Nitihka Kementerian Pelajaran Malaysia (1988), pengaya tu mai reti aktiviti-aktiviti tambah ngagai aktiviti asal dalam pengawa ngajar ke ngembuan elemen-elemen ti dikena ngerembaika agi penemu enggau peneleba sereta nyungkakka agi pengelandik ke diajar. Nengah aktiviti-aktiviti pengaya tu, nembiak dilatih ngerembaika agi penemu, minat, kreativiti enggau pikir runding sida deka belajar. Faridah Nazir enggau Tuan Jah (2013) dalam bup Pengajian Sukatan Pelajaran Bahasa Melayu Sekolah Rendah, mega nyukung bejuraika aktiviti pengaya tu nya siti aktiviti ti ngerinduka sereta bisi chabar agi ti dikena meri peluang ngagai nembiak ngerembaika pengingin ati deka nemu, semangat deka belajar kediri, nyungkakka kreativiti enggau tanggung pengawa nyadi ketuai. Siti bida aktiviti pengaya tu enggau seridi nya aktiviti pengaya tu disediaka ngagai semua nembiak enda ngira sekalika nembiak nya nyulut agi, sedang-sedang enggau nembiak ti lemi.

Nambahka nya mega, aktiviti pengaya tu bebida ari aktiviti bukai ti diajar dalam kelas. Aktiviti pengaya tu mesti dipejalaika tauka diberi sepengudah genap iku nembiak ulih nguasa sesebengkah pengelandik ti diajar dalam kelas. Nyadi, nengah pengelandik ke udah dikuasa nembiak deka bejalaika aktiviti pengaya dalam kelas. Tajapan pia, aktiviti pengaya tu ukai semina dipejalaika maya kelas aja tang mega ulih dipejalaika di luar awak sekula. Faiziah Hj. Shamsudin, Khairuddin Mohamad & Maridah Alias. (2013), dalam bup Bahasa Melayu Pemulihan bejuraika bisi tiga strategi bejalaika aktiviti pengaya ngagai nembiak. Tiga iti strategi tu iya nya aktiviti pengaya ba raban nitihka pengelandik, kedua nya aktiviti pengaya dipejalaika berebak enggau aktiviti seridi enggau strategi kepenudi nya aktiviti pengaya ba raban mayuh pengelandik. Nyadi, genap strategi tu patut dipejalaika enggau manah ulih pengajar dikena nyungkakka pengelemi ke dikembuan genap iku nembiak.

Nyadi ke simpul, pengajar patut landik ngelanggur proses ngajar enggau belajar dalam kelas awakka nembiak ke lemi ulih ngemansangka tikas pengulih sida. Siti strategi ti nemban sereta seriran dikena pengajar iya nya bekenaka teknik enggau ripih jalai ti bemacham laban nembiak ngembuan tikas pengulih ti bebida enggau pangan diri.