Objektif Pengaya enggau Seridi proses ngajar enggau
belajar
Pengaya enggau seridi endang ngembuan objektif kediri empu kelebih agi
dalam nyungkakka pengelandik ke dikembuan nembiak. Nyadi, keterubah iya nya
kitai deka ngerintaika objektif pengaya lalu ditangkan enggau objektif seridi
ngagai nembiak. Pengaya tu siti ari pengawa bejalaika aktiviti belajar ti lebih
meri chabar ngagai tikas pengulih nembiak. Pekara ti deka diajar ngagai nembiak
nya ari tikas ke mudah ngagai tikas ke mar agi.
Tuju pengaya tu
dipejalaika ngagai nembiak nya dikena nyungkakka pengelandik bepikir ngagai
ngagai nembiak dalam mutarka sesebengkah penanggul. Reti iya nembiak ulih meri
tuduh penemu enggau ulih mikirka chara ke patut lebuh mutarka sesebengkah
penanggul. Minat enggau peneleba nembiak mega ulih ditambahka awakka ulih ngerembaika pengulih sida dalam
pelajar. Nengah pengaya tu mega awak lepa nembiak ulih diisi enggau pengawa ke
manah nitihka minat enggau tikas pengerembai nembiak.
Kelimpah ari nya,
pengaya tu beguna amat dikena nembiak bulih pengelandik ke bukai kelimpah ari
pengelandik ke sigi udah dikembuan sida. Pengelandik ke dikembuan nembiak tu
beguna amat dikena belajar sepemanjai idup sida. Enggau nya mega, kreativiti
enggau inovasi nembiak ulih disungkak nengah pengaya tu. Chara ti seriran
ngambika chunto, ngelatih nembiak bekenaka tikas runding ti tinggi ti dikumbai
Pengelandik Bepikir Tikas Tinggi (PBTT).
Seridi mega siti
pengawa pelajar ti patut dipejalaika ngagai nembiak ulih pengajar dalam kelas.
Seridi tu beguna bendar dikena mantu nembiak ke bedau nguasa sesebengkah pengelandik
ti diajar dalam kelas. Nyadi objektif pengawa seridi tu iya nya beguna amat
ngambika genap iku nembiak nguasa pengelandik ti diajar ngagai sida dalam
kelas. Nengah seridi tu, pengajar deka mantu nembiak ke ngembuan penanggul
pelajar sechara kediri.
Pengerembai nembiak
mega ulih dikerembaika agi nengah seridi tu. Nya alai, latih seridi ti
disediaka pengajar patut nemban nitihka tikas pengulih ti dikembuan nembiak.
Kebuah pia laban nembiak endang sigi ngembuan pengeregas ke bebida enggau
pangan diri. Ngambika chunto, dalam siti-siti kelas bisi nembiak ke regas agi,
jelan penyeregas enggau nembiak ti lemi. Nyadi, seridi tu nemban amat dikena
meri ruang ngagai nembiak ke lemi ngasaika pemujur dalam bidang pelajar sida.
Enggau nya tadi, dia sida nembiak ke lemi dalam pelajar tu tadi berasai
besemangat deka belajar nyulut agi nitihka nembiak bukai.
Nengah seridi tu mega,
baka nembiak bukai ke landik, nembiak seridi deka bulih peluang ke sama enggau
ngaulka diri sepenuh iya dalam tiap aktiviti ti dilanggur dalam kelas. Reti
iya, kaul entara nembiak dikemeranka lebuh bejalaika proses ngajar enggau belajar
dalam kelas. Kelimpah nya, seridi tu ngulihka nembiak nerima nerima pelajar
sechara kediri nitihka tikas pengulih sida empu. Ngena chara tu, nembiak
kelebih agi nembiak ti lubah nguasa pekara ti diajar deka bulih motivasyen deka
belajar.
Nya alai, pengawa
pengaya enggau seridi tu endang siti pengawa pelajar ti patut dikemeranka agi
sereta dikemajuka. Kebuah pia laban nengah dua iti pengawa tu, tikas pengulih,
pengelandik enggau peneleba genap iku nembika deka dikerembaika enggau
dikemansangka agi. Pikir runding nengah tikas tinggi bala nembiak mega deka
disungkakka agi. Nyadi, tanggung pengawa pengajar beguna amat lebuh ngajar
sereta ngelanggur aktiviti ngajar sida enggau semitan. Strategi, aktiviti
enggau latih ti dipejalaika mesti seriran enggau tikas pengulih nembiak. Nengah
chara ti bakatu, pemujur nembiak deka ulih dikemansangka agi seninjik enggau
juluk Falsafah Pendidikan Kebangsaan ti ngembuan juluk ati deka nempa nembiak
ti landik dalam mayuh bansa pengawa kelebih agi dalam bidang pelajar.
No comments:
Post a Comment